Entertainment 

ज्येष्ठ साहित्यिक, नाटककार रत्नाकर मतकरी यांचे कोरोना मुळे निधन!

Share This Post

साहित्य विश्वातील मोठं नाव रत्नाकर मतकरी यांचे निधन झाले. सेव्हन हिल्स या हॉस्पिटल मध्ये काल (17 मे रोजी) रात्री ११ वाजताच्या सुमारास वयाच्या ८१ वर्षी घेतला अखेरचा श्वास. मतकरींच्या निधनाने साहित्यविश्वावर शोककळा पसरली आहे. काही दिवसांपासून त्यांना थकवा जाणवत असल्याकारणाने ४ दिवसापूर्वी हॉस्पिटलमध्ये ॲडमिट केले होते आणि तिथेच त्यांचे कोविड पॉझिटीव्ह निदान झाले होते. ज्येष्ठ साहित्यिक, नाटककार, लेखक, रंगकर्मी आणि राष्ट्रीय पुरस्कार विजेते चित्रपट दिग्दर्शक रत्नाकर मतकरी अशी ओळख सर्वाना सर्वश्रुत आहे.

१९५५ ते २०२० अशी यांची कारकीर्द ठरली. वयाच्या १७ वर्षी त्यांची पहिली एकांकिका ‘वेडी माणसं’ हि आकाशवाणी च्या मुंबई केंद्रावरून प्रकाशित झाली होती. मतकरींची ‘लोककथा 78’, ‘दुभंग’, ‘अश्वमेध’, ‘माझं काय चुकलं?’, ‘जावई माझा भला’, ‘चार दिवस प्रेमाचे’, ‘घर तिघांचं हवं’, ‘खोल खोल पाणी’, ‘इंदिरा ‘, आणि इतर अनेक नाटके नाट्य रसिकांच्या मनात घर करुन आहेत. अलीकडेच ‘अलबत्या गलबत्या’ आणि ‘निम्मा, शिम्मा राक्षस’ या मुलांच्या, तसच महाभारतातल्या अंतिम पर्वावर आधारीत ‘आरण्यक’ या नाटकांनी रंगभूमी गाजवून सोडली. वास्तवाचे भान देणाऱ्या गूढकथा हा कथाप्रकार त्यांनी एकहाती वाचकांपर्यंत पोचवला.

मोठ्यांसाठी ७० तर मुलांसाठी २२ नाटकं, अनेक एकांकिका, २० कथासंग्रह, ३ कादंबऱ्या, १२ लेख संग्रह, आपल्या रंगभूमीवरल्या कामाचा सखोल विचार करणारा आत्मचरित्रात्मक ग्रंथ ‘माझे रंगप्रयोग’ अशी त्यांची विपुल साहित्यसंपदा आहे. ‘गहिरे पाणी’, ‘अश्वमेध’, ‘बेरीज वजाबाकी’ या मालिका, सर्वोत्कृष्ट मराठी चित्रपटाचा राष्ट्रीय पुरस्कार मिळालेला चित्रपट ‘इन्वेस्टमेन्ट’ अशी त्यांची इतर माध्यमामधली कामंही रसिकप्रिय ठरली आहेत.

रत्नाकर मतकरींना विपुल पुरस्कार आणि सन्मान मिळालेले आहेत. संगीत नाटक अकादमी आणि साहित्य अकादमी या दोन्ही मान्यवर संस्थांकडून पुरस्कारप्राप्त ठरलेल्या मोजक्या व्यक्तिमत्वात त्यांचा समावेश होतो.

रत्नाकर मतकरींच्या पश्चात निर्मिती आणि अभिनयाच्या क्षेत्रात काम करणाऱ्या त्यांच्या पत्नी प्रतिभा मतकरी, कन्या अभिनेत्री सुप्रिया विनोद, पुत्र लेखक/समीक्षक गणेश मतकरी, जावई डाॅ. मिलिंद विनोद, स्नुषा आर्किटेक्ट पल्लवी मतकरी आणि नातवंडेअसा परिवार आहे. मतकरींच्या जाण्याने साहित्य आणि रंगभूमी या क्षेत्रात एक न भरुन येणारी पोकळी निर्माण झाली आहे